സിയാറ്റിലിൽ മലയാളി സമൂഹത്തിന്റെ സാംസ്കാരിക മുന്നേറ്റത്തിന് പുതിയ ഊർജം; KAWയുടെ പ്രവർത്തനങ്ങൾ ശ്രദ്ധേയമാകുന്നു
Kerala Association of Washington (KAW) Strengthens Cultural and Social Ties Among Malayalis in Greater Seattle
പ്രസാദ് തീയാടിക്കൽ
സിയാറ്റിൽ: അമേരിക്കയിലെ ഗ്രേറ്റർ സിയാറ്റിൽ മേഖലയിലെ നാലായിരത്തിലധികം മലയാളി കുടുംബങ്ങളെ ഒരുമിപ്പിച്ച് സാംസ്കാരികവും വിദ്യാഭ്യാസപരവും സാമൂഹികവുമായ പ്രവർത്തനങ്ങൾ ശക്തമാക്കി കേരള അസോസിയേഷൻ ഓഫ് വാഷിംഗ്ടൺ (KAW).
മലയാളി സമൂഹത്തിന്റെ ഭാഷയും സംസ്കാരവും പുതുതലമുറയിലേക്ക് കൈമാറുക എന്ന ലക്ഷ്യത്തോടെ സംഘടന മലയാളം ക്ലാസുകൾ, കായിക മത്സരങ്ങൾ, കുടുംബസംഗമങ്ങൾ, ഓണാഘോഷം, ക്രിസ്മസ് ആഘോഷം തുടങ്ങി വർഷം മുഴുവൻ വിവിധ പരിപാടികൾ സംഘടിപ്പിച്ചുവരികയാണ്.
കുട്ടികൾക്കായി പ്രവർത്തിക്കുന്ന മലയാളം സ്കൂളിലൂടെ ഭാഷാപഠനത്തിനും കേരളീയ പൈതൃക സംരക്ഷണത്തിനും പ്രത്യേക പ്രാധാന്യം നൽകുന്ന സംഘടന, വർഷംതോറും നിരവധി കായിക മത്സരങ്ങളും കലാപരിപാടികളും സാമൂഹിക സേവന പ്രവർത്തനങ്ങളും സംഘടിപ്പിക്കുന്നു. കൂടാതെ ഓണസദ്യ, സാംസ്കാരിക വിരുന്നുകൾ, കുടുംബ വിനോദപരിപാടികൾ എന്നിവയിലൂടെ വിവിധ പ്രായക്കാരായ മലയാളികളെ ഒരേ വേദിയിൽ എത്തിക്കുന്നതിലും KAW ശ്രദ്ധ കേന്ദ്രീകരിച്ചിരിക്കുകയാണ്.
സിയാറ്റിൽ മേഖലയിലെ മലയാളി സമൂഹത്തിന്റെ ഐക്യവും സാംസ്കാരിക പാരമ്പര്യവും ശക്തിപ്പെടുത്തുക എന്ന ലക്ഷ്യത്തോടെ സംഘടനയുടെ പ്രവർത്തനങ്ങൾ തുടർന്നുവരുന്നതായും ഭാരവാഹികൾ അറിയിച്ചു.
English Summary: Kerala Association of Washington (KAW) Strengthens Cultural and Social Ties Among Malayalis in Greater Seattle
ശബരിമല: ഭക്തര് ദര്ശന സമയത്തില് മാറ്റം വരുത്തണമെന്ന് ദേവസ്വം ബോര്ഡ്
തീവ്ര മഴയെ തുടര്ന്ന് പമ്പാ നദിയില് വെള്ളപൊക്കം ഉണ്ടായ പശ്ചാത്തലത്തില് നിറപുത്തരി ചടങ്ങുകള്ക്ക് ശബരിമല നട തുറക്കുന്ന ഓഗസ്റ്റ് 2, 3 തീയതികളില് ശബരിമല ദര്ശനം നടത്താന് തീരുമാനിച്ചിട്ടുള്ള ഭക്തര് കഴിവതും യാത്ര ഒഴിവാക്കണമെന്ന് തിരുവിതാംകൂര് ദേവസ്വം ബോര്ഡ് അറിയിച്ചു.
ഓഗസ്റ്റ് മാസത്തില് തന്നെ ചിങ്ങമാസ പൂജകള്ക്കായും (ഓഗസ്റ്റ് 16 മുതല് 21 വരെയും) ഓണത്തോട് അനുബന്ധിച്ച പൂജകള്ക്കായും (ഓഗസ്റ്റ് 24 മുതല് 28 വരെയും) ശബരിമല നട തുറക്കുന്നുണ്ട്. ഇത് ദര്ശനത്തിനായി ഭക്തര്ക്ക് തിരഞ്ഞെടുക്കാവുന്നതാണെന്നും ബോര്ഡ് പറഞ്ഞു. കനത്ത മഴ തുടരുന്നതിനാലും മണ്ണിടിച്ചില് സാധ്യതയുള്ളതിനാലുമാണ് തിരുവിതാംകൂര് ദേവസ്വം ബോര്ഡ് ഭക്തരോട് ഇത്തരത്തില് ഒരു അഭ്യര്ത്ഥന നടത്തിയത്.
English Summary: The Travancore Devaswom Board (TDB) has requested devotees to avoid visiting the Sabarimala temple on August 2 and 3 during the Niraputhari rituals, following severe flooding in the Pamba River caused by heavy rainfall.
